Kryeministrja italiane Giorgia Meloni ka theksuar se nuk pajtohet me kritikat e kancelarit gjerman Friedrich Merz ndaj Shteteve të Bashkuara dhe projektit “MAGA” të Donald Trump. Ajo ka deklaruar se prioritet i Evropës duhet të jetë forcimi i rolit të saj gjeopolitik dhe rritja e përgjegjësisë për sigurinë e kontinentit.
Duke folur nga Adis Ababa, gjatë një vizite në Etiopi, Meloni theksoi se vlerësimet politike janë subjektive dhe çdo udhëheqës mund të ketë mendime të ndryshme. Ajo pranoi thelbin e mesazhit të Merzit, për nevojen që Evropa të fokusohet më tepër te vetja e saj. Sipas saj, kontinenti duhet të kontribuojë më shumë në sigurinë e tij dhe të forcojë aksin europian brenda NATO-s, pavarësisht marrëdhënieve me Shtetet e Bashkuara. “Duhet të punojmë për atë që na bashkon, jo për atë që na ndan. Evropa duhet të rikuperojë rolin e saj si një lojtar i vërtetë gjeopolitik,” shprehu Meloni.
Përveç kësaj, kryeministrja italiane njoftoi se Italia është ftuar të marrë pjesë si vend vëzhgues në takimin e Bordit të Paqes për Gazën, që do të zhvillohet më 19 shkurt në Washington, nën thirrjen e presidentit Trump. Meloni e konsideroi këtë formulë si një kompromis të pranueshëm, duke marrë parasysh çështjet kushtetuese që lidhen me anëtarësimin e plotë. Ajo shprehu se do t’i përgjigjën pozitivisht ftesës, por se mbetet për t’u parë se në çfarë mase do të angazhohen.
Duket se Meloni synon të ruajë një pozicion të balancuar, duke njohur nevojën për një Evropë më të fortë dhe të pavarur, por pa përplasje të hapura me SHBA-në. Kjo qasje e saj mund të reflektojë një strategji afatgjatë për të forcuar pozitat e Italisë brenda Bashkimit Evropian dhe për të kontribuar në iniciativat e sigurisë rajonale.
