Kryeministri i Kosovës, Albin Kurti, nëpërmjet njoftimit në platformën e tij X, ka bërë të ditur se ka zhvilluar një takim me delegacionin dypartiak amerikan.
Sipas njoftimit, Kurti thotë se gjatë takimit u diskutua çështja e marrëdhënies Kosovë-Serbi, si dhe angazhimi i Kosovës për t’u bërë pjesë e Bashkimit Evropian
“Ishte kënaqësi të takohesha me një delegacion dypartiak amerikan të përbërë nga senatorët Jeanne Shaheen, Chris Murphy, Thom Tillis dhe Ruben Gallego. Diskutuam progresin e Kosovës, i cili është i dukshëm si në aspektin demokratik ashtu edhe në atë ekonomik. Gjithashtu folëm për angazhimin e qartë të Kosovës për t’u bashkuar me Bashkimin Evropian dhe shprehëm mirënjohjen tonë për Shtetet e Bashkuara, një aleat i domosdoshëm. Theksova se, sa i përket marrëdhënieve me Serbinë, Milan Radoicic duhet të dorëzohet për t’u përballur me drejtësinë, Marrëveshja Bazë duhet të nënshkruhet dhe letra nga Brnabiç, e cila në formë të shkruar mohon integritetin territorial të vendit tonë, duhet të tërhiqet. Këta hapa do të siguronin llogaridhënie dhe qëndrueshmëri në procesin e normalizimit të marrëdhënieve”, shkruan Kurti.
