Tre javë pas heqjes së traktorëve të tyre nga rrugët, fermerët grekë kanë marshuar drejt Athinës. Të dielën, mijëra fermerë, me qindra traktorë, u grumbulluan në sheshin Sintagma, duke e kthyer atë në qendër të protestës së sektorit bujqësor. Ata kanë mbërritur nga të gjitha anët e vendit me autobusë, makina, anije dhe avionë, ndërsa traktorët u dezinfektuan për shkak të rrezikut nga sëmundjet e bagëtive.
Protesta, e organizuar nga Komiteti Panhelen i Bllokadave të rrugëve, shënoi një moment të dukshëm për fermierët që thonë se problemet e tyre mbeten të pazgjidhura. Këta fermerë protestojnë ndaj rritjes së kostos së prodhimit dhe çmimeve të ulëta të produkteve, duke kërkuar kompensim për të ardhurat e humbura. Sipas përfaqësuesve të tyre, takimet e fundit me kryeministrin kanë sjellë premtime, por asnjë rezultat konkret.
Kërkesat kryesore të fermerëve përfshijnë uljen e çmimit të energjisë elektrike, naftën pa taksa shtesë për makineritë bujqësore dhe mbështetje për blegtorinë. Ata gjithashtu kërkojnë përshpejtimin e pagesave të subvencioneve, duke paralajmëruar se prodhimi bujqësor rrezikon të bëhet i paqëndrueshëm nëse situata nuk përmirësohet.
Atmosfera në Sintagma është e gjallë, me pjesëmarrës nga sindikatat dhe organizatat punëtore që i shprehin mbështetje fermerëve. Përfaqësuesit e sektorit primar kanë vendosur të kalojnë natën në sheshin përpara Parlamentit dhe pritet të largohen të organizuar ditën e nesërme. Ata theksojnë se mobilizimet do të vazhdojnë deri në përmbushjen e kërkesave të tyre, duke paralajmëruar se, nëse masat konkrete për mbështetje të bujqësisë nuk merren, bllokadat mund të rikthehen.
Fermierët shprehin vendosmërinë për të luftuar për të drejtat e tyre dhe për të mbajtur gjallë zonat rurale, duke e bërë të qartë se janë të gatshëm të vazhdojnë protestat derisa kërkesat e tyre të merren parasysh.
