Reagimi nga Brukseli erdhi menjëherë pas përfundimit të “betejës” për Superligën Evropiane. Komisioneri i Bashkimit Europian për Rininë dhe Sportin, Glenn Micallef, përshëndeti marrëveshjen e shpallur të mërkurën mes UEFA-s dhe Real Madridit, vetëm pak minuta pasi u bë zyrtare. Sipas tij, dështimi i projektit përbën një “fitore për meritën sportive dhe unitetin”.
“Urime UEFA-s për marrëveshjen në parim të arritur sot me Shoqatën Evropiane të Klubeve (ECA) dhe Real Madrid, e cila do të shërbejë për të zgjidhur mosmarrëveshjet e tyre ligjore lidhur me Superligën Evropiane”, shkroi Micallef në një deklaratë të shkurtër të publikuar në rrjetet sociale.
Komisioneri e shoqëroi postimin me një imazh ku lexohej fraza “duke mbrojtur futbollin europian” dhe me disa hashtagë që nënvizonin “meritën sportive” dhe parimin “tifozët të parët”. Vlen të theksohet se Komisioni Europian ka qenë vazhdimisht kritik ndaj modelit sportiv të Superligës që prej prezantimit të tij në vitin 2021 nga një grup klubesh europiane, mes tyre Real Madrid dhe Barcelona.
Në dhjetor 2023, Gjykata e Drejtësisë e Bashkimit Europian vendosi se vetoja e UEFA-s dhe FIFA-s ndaj Superligës ishte e paligjshme, duke argumentuar se rregullat e tyre nuk kishin kritere që garantonin transparencë, proporcionalitet dhe objektivitet. Gjykata arriti gjithashtu në përfundimin se UEFA dhe FIFA po “abuzonin me pozicionin dominues” përmes kontrollit ekskluziv mbi shfrytëzimin komercial të të drejtave që burojnë nga garat që ato organizojnë.
Megjithatë, pavarësisht këtij vendimi, Komisioni Europian e ka ruajtur kriticizmin ndaj Superligës. Ish-nënkryetari përgjegjës për sportin, Margaritis Schinas, kishte paralajmëruar se futbolli europian përfaqëson “vlera” kohezioni dhe nuk duhet të jetë diçka e rezervuar “për elitat”.
