Trajneri gjerman Thomas Tuchel ka rinovuar kontratën me kombëtaren e Anglisë deri në vitin 2028, edhe pse marrëveshja e mëparshme ishte planifikuar të përfundonte verën e ardhshme, pas Kupës së Botës. Tuchel mori drejtimin në janar 2025, si pasues i Gareth Southgate, dhe Federata Angleze (FA) ka vendosur t’i zgjasë bashkëpunimin edhe me dy vite të tjera, për ta mbajtur në krye të ekipit deri pas Euro 2028, që do të zhvillohet në Britaninë e Madhe dhe Irlandë.
Me këtë rinovim, Anglia synon të shmangë spekulimet që mund të lindin para dhe gjatë Botërorit për të ardhmen e trajnerit. Në moshën 52-vjeçare, Tuchel do të ishte një emër i kërkuar edhe për poste të tjera trajneri në klube, nëse do të bëhej i lirë – ndaj FA ka preferuar ta “mbyllë” çështjen që tani.
Që prej ardhjes së tij në krye të “Tre Luanëve”, Tuchel është përballur edhe me presion e debate: si trajneri i tretë i huaj në historinë e Anglisë (pas Sven-Göran Eriksson dhe Fabio Capello), ai u vu në qendër të vëmendjes për tema si himni “God Save the King”, kritikat se nuk jeton në Angli dhe nuk ndjek mjaft ndeshje të Premier League live, madje edhe batuta si ajo e Harry Redknapp që e quajti “spiun” për shkak të origjinës gjermane.
Një nga temat më delikate për të ka qenë edhe “çështja Bellingham”. Tuchel kishte zbuluar se i kërkoi falje Jude Bellingham pasi e kishte përshkruar sjelljen e tij në fushë si “të neveritshme”, koment i bërë pas humbjes ndaj Senegalit në qershor. Situata e mesfushorit të Real Madrid, i cili nuk është në formën më të mirë dhe ka mbetur jashtë dy herë (njëherë për dëmtim dhe njëherë për vendim teknik), shihet si një nga enigmat kryesore për t’u zgjidhur para Botërorit, sidomos me konkurrencën e emrave si Morgan Rogers, Cole Palmer dhe Phil Foden.
Në drejtim të rezultateve, Tuchel ka drejtuar Anglinë në 10 ndeshje, me 9 fitore dhe vetëm 1 humbje (kundër Senegalit, në miqësore). Anglia i fitoi të gjitha ndeshjet kualifikuese të Botërorit pa pësuar gol. Debutimi në Botëror parashikohet më 17 qershor kundër Kroacisë, më pas me Ganan dhe Panamanë, ndërsa miqësoret e radhës në mars janë planifikuar ndaj Uruguait dhe Japonisë.
