Një avion ushtarak modern i prodhimit europian, i tipit “Airbus”, ka ateruar sot në Aeroportin Ndërkombëtar të Prishtinës, pas një fluturimi që ka nisur nga Fliegerhorst Wunstorf, baza ajrore e Forcave Ajrore Gjermane (Luftwaffe), e vendosur pranë qytetit Wunstorf.
Nga të dhënat e siguruara nga platofrma ku dhe mund të gjejmë të gjithë fluturimet në kohë reale, mësohet se ky avion sapo është ulur në Aeroportin e Prishtinës.
Baza ajrore e Wunstorf-it është një nga qendrat kryesore të Forcave Ajrore Gjermane (Luftwaffe) dhe përdoret për operacione transporti ajror ushtarak. Në këtë bazë ndodhet edhe “JU52-Halle”, një hangar-muze i dedikuar avionit historik Ju 52.
Avioni Airbus që operon në kuadër të Luftwaffe-s është një mjet modern transporti ushtarak, i aftë të bartë deri në 37 ton ngarkesë, përfshirë pajisje ushtarake dhe logjistike. Ai përdoret gjithashtu për transportin e ushtarëve, parashutistëve, forcave speciale dhe personelit ushtarak me pajisje të plotë.
Ende nuk ka një njoftim zyrtar mbi qëllimin konkret të fluturimit drejt Kosovës, por prania e avionëve të tillë zakonisht lidhet me misione logjistike, bashkëpunim ushtarak ose angazhime në kuadër të operacioneve ndërkombëtare të sigurisë.
Avioni Airbus A400M:
Një nga avionët më modernë të transportit ushtarak në Europë, Airbus A400M Atlas, vazhdon të luajë një rol kyç në operacionet ajrore të vendeve të NATO-s dhe më gjerë.
Avioni që ka ateruar sot në Prishtinë është Airbus A400M, një avion transporti ushtarak shumëfunksional, i zhvilluar nga kompania evropiane Airbus Defence and Space. Ai është projektuar për të mbushur hendekun mes avionëve të lehtë transportues dhe atyre strategjikë të rëndë, duke kombinuar fuqi, fleksibilitet dhe teknologji të avancuar.
A400M përdoret për një gamë të gjerë misionesh, transport trupash dhe pajisjesh ushtarake, ndihmë humanitare, evakuime emergjente, si dhe furnizim ajror të avionëve të tjerë në fluturim. Falë motorëve të tij turboprop TP400-D6, më të fuqishmit e këtij lloji në botë, avioni është në gjendje të operojë edhe nga pista të shkurtra ose të papërgatitura, një avantazh i madh në zona krize.
Me një kapacitet ngarkese deri në 37 tonë, A400M mund të transportojë automjete të blinduara, helikopterë, pajisje të rënda ushtarake ose ndihma humanitare në zona të vështira për t’u arritur. Shpejtësia e lartë dhe rrezja e gjatë e fluturimit e bëjnë atë ideal si për misione taktike ashtu edhe strategjike.
Ky avion është në përdorim nga disa shtete evropiane, përfshirë Gjermaninë, Francën, Spanjën, Mbretërinë e Bashkuar dhe Turqinë, dhe shpesh shihet në baza ajrore si ajo e Wunstorf-it në Gjermani, një nga qendrat kryesore të operimit të tij.
