Mikel Merino do t’i nënshtrohet operacionit këtë të hënë dhe pritet të mungojë rreth katër muaj, çka e vë në dyshim edhe pjesëmarrjen e tij në Kupën e Botës me kombëtaren e Spanjës. Mesfushori i Arsenalit ka pësuar një frakturë nga mbingarkesa në këmbë, ka humbur tre ndeshjet e fundit dhe, sipas pritshmërive, do të mbetet jashtë deri në fund të sezonit.
Edhe pse Arsenali nuk ka dhënë një afat zyrtar rikuperimi, ideja është që Merino të rikthehet në stërvitje në fund të sezonit dhe të tentojë të jetë gati për javët e fundit, me synimin kryesor që të mos humbasë Botërorin, ku – nëse është i shëndetshëm – konsiderohet pjesë e rëndësishme e sistemit të Luis de la Fuente.
Merino ishte në tribuna në “Emirates” të shtunën, kur Arsenali fitoi 3-0 ndaj Sunderland. Miku i tij Martín Zubimendi i dedikoi golin e parë, duke festuar pranë flamurit të këndit ashtu siç bën zakonisht Merino dhe më pas duke treguar drejt tij në tribunë.
Në konferencën para ndeshjes, Mikel Arteta e theksoi rëndësinë e Merinos për ekipin dhe pranoi se mungesa e tij do të ndihet: “Është një goditje e madhe. Mikel sjell diçka ndryshe, por do të jetë jashtë për muaj, ndaj duhet ta mbështesim dhe ta mbajmë të lidhur me grupin, sepse mund t’u japë shumë të gjithëve,” u shpreh trajneri spanjoll.
