Dy skuadra të futbollit amerikan, Seattle Seahawks dhe New England Patriots, do të përballen të dielën në Super Bowl LX, por vëmendja nuk do të jetë vetëm te ndeshja. Spektakli i pushimit të ndeshjes ka ndezur një debat të fortë kulturor dhe politik, për shkak të përzgjedhjes së superyllit Bad Bunny si kryefjalë e performancës.
Bad Bunny, artisti më i dëgjuar në botë dhe i njohur për qëndrimet e tij kritike ndaj politikave amerikane të emigracionit, është përballur me reagime të ashpra nga qarqet konservatore. Republikanët e kanë quajtur Super Bowl-in e këtij viti “woke bowl”, ndërsa presidenti amerikan Donald Trump e cilësoi përzgjedhjen e tij si “absolutisht qesharake”. Edhe drejtues të tjerë republikanë e kanë kritikuar hapur vendimin e NFL-së.
Si reagim, organizata konservatore Turning Point USA ka paralajmëruar një program alternativ “All American” gjatë performancës së Bad Bunny-t, me Kid Rock si figurë kryesore.
Debati nisi para se artisti të ngjitej në skenë, kryesisht për shkak të qëndrimeve të tij publike kundër operacioneve të ICE (Immigration and Customs Enforcement). Gjatë ceremonisë së fundit të Grammy Awards, ku fitoi çmimin kryesor, Bad Bunny deklaroi hapur “ICE out”, në kritikë të operacioneve të ndalimit dhe deportimit të emigrantëve në SHBA.
Administrata Trump ka mbrojtur këto politika, duke theksuar se synojnë deportimin e personave pa dokumente me precedentë penalë, por operacionet kanë qenë objekt kritikash të forta dhe hetimesh, përfshirë raste ku janë vrarë qytetarë amerikanë gjatë ndërhyrjeve federale.
Ekspertët e konsiderojnë praninë e Bad Bunny-t në skenën e Super Bowl-it si “thellësisht politike”. Ai do të jetë artisti i parë në histori që realizon të gjithë spektaklin e pushimit të ndeshjes vetëm në gjuhën spanjolle, në një nga eventet televizive më të ndjekura në botë, me mbi 100 milionë shikues vetëm në SHBA.
Vitet e fundit, spektakli i Super Bowl-it ka qenë gjithnjë e më i ngarkuar politikisht. Performanca e Beyoncé-s në vitin 2016, si dhe ajo e Jennifer Lopez dhe Shakira-s në vitin 2020, u interpretuan si kritika të drejtpërdrejta ndaj politikave të administratës Trump, veçanërisht në lidhje me emigracionin dhe trajtimin e Porto Rikos.
Bad Bunny ka përdorur vazhdimisht muzikën dhe platformën e tij për të promovuar identitetin portorikan, për të mbështetur komunitetin LGBTQ+ dhe për të kërkuar më shumë të drejta për Porto Rikon, e cila është territor amerikan që nga viti 1898, por pa përfaqësim të plotë politik në Kongres.
Në veprat e tij të fundit artistike, ai ka kritikuar hapur politikat e emigracionit dhe narrativën nacionaliste amerikane, duke ofruar një vizion alternativ të asaj që do të thotë të jesh amerikan. Vetë performanca e tij në Super Bowl pritet të jetë simbolike dhe potencialisht polarizuese, edhe nëse mesazhi politik nuk artikulohet drejtpërdrejt.
Sipas analistëve, rëndësia kulturore globale e Bad Bunny-t shpjegon edhe vendimin e NFL-së për ta përzgjedhur, në kuadër të përpjekjeve për të zgjeruar audiencën latino-amerikane dhe për ta pozicionuar ligën si më gjithëpërfshirëse dhe globale.
NFL ka mbrojtur vendimin, duke theksuar se platforma e Super Bowl-it synon të bashkojë njerëzit.
