Agjencia federale amerikane për mbrojtjen e të drejtave civile të punonjësve, Komisioni i Mundësive të Barabarta të Punësimit (EEOC), njoftoi të mërkurën se ka nisur një hetim ndaj kompanisë Nike, për pretendime se politikat e saj të diversitetit diskriminojnë punonjësit e bardhë.
Hetimi u bë publik përmes një dokumenti të depozituar në një gjykatë federale në Missouri, ku EEOC kërkon që Nike të përmbushë një thirrje zyrtare për dorëzimin e informacionit.
Ky veprim përkon me qëndrimin kritik të administratës Trump ndaj iniciativave për Diversitet, Barazi dhe Përfshirje (DEI), të cilat disa zyrtarë i shohin si rrezik për krijimin e asaj që quhet “diskriminim i kundërt”.
Nisma për hetimin lidhet me ish-komisioneren Andrea Lucas, e emëruar nga Donald Trump si kryetare e EEOC, e cila ka theksuar se këto politika mund të ndikojnë drejtpërdrejt në proceset e rekrutimit dhe punësimit.
Nike, e cila ka vendosur objektiva konkrete për rritjen e përfaqësimit të grupeve racore dhe etnike, u akuzua se ka përdorur të dhëna publike si pjesë e këtyre politikave. Kompania ka deklaruar se do të bashkëpunojë me autoritetet, por e ka cilësuar hetimin si një “shkallëzim të papritur”.
Kundërshtimi ndaj DEI-së është shndërruar në një temë qendrore politike në SHBA. Kritikët e përshkruajnë atë si një formë diskriminimi pozitiv, duke argumentuar se, ndonëse synon të mbështesë grupet e margjinalizuara, mund të anashkalojë punonjës të tjerë, përfshirë të bardhët.
Kjo narrativë është përforcuar edhe nga grupe të ekstremit të djathtë në SHBA dhe Evropë, duke e kthyer DEI-në në një çështje të nxehtë në debatin politik federal.
EEOC ka nisur hetime të ngjashme edhe ndaj kompanive të tjera, përfshirë Northwestern Mutual, dhe ka theksuar se do të ndërmarrë çdo hap të nevojshëm për të garantuar se nuk ka praktika diskriminuese në vendet e punës.
Ndërkohë, Andrea Lucas ka inkurajuar burrat e bardhë të paraqesin ankesa për diskriminim në punë, duke rritur më tej tensionet rreth zbatimit të politikave të DEI.
Rasti i Nike shihet si një shembull domethënës i përplasjes mes ideologjive të kundërta dhe përpjekjeve për të balancuar barazinë, diversitetin dhe praktikat konkrete në vendin e punës.
