Inter dhe Atalanta do të përballen sërish në gjysmëfinalen e Superkupës së Italisë, katër muaj pas ndeshjes së tyre në San Siro, që përfundoi me një fitore të thellë 4-0 për Interin. Këtë herë, një “Atalantë ndryshe” do të dalë në fushë, jo vetëm me ndryshime në përbërje, por edhe në frymën e ekipit.
Rezultati 4-0 i 30 gushtit
Fitorja e Interit në gusht ishte një demonstrim i plotë dominimi. Marcus Thuram ishte ylli i ndeshjes, duke shënuar dy gola të ngjashëm mes minutës së 47-të dhe 56-të, ndërsa një autogol i Djimsiti dhe një supergol nga Barella vulosën fitoren e zikaltërve. Për Atalantën, ajo humbje erdhi në një moment kaotik, ku ekipi ishte i tronditur nga transferimet e verës dhe mungesa e qartësisë mendore.
Si ka ndryshuar Interi
Për Interin, ndryshimet në skuadër janë të pakta. Mbrojtja do të jetë ndryshe për dy të tretat, me Pavard dhe Acerbi jashtë formacionit, zëvendësuar nga Bisseck dhe de Vrij. Në krahun e djathtë, Dumfries pritet të jetë titullar në vend të Darmianit, i cili është rikuperuar nga një problem fizik. Përtej kësaj, Interi duket se ka rigjetur formën “kanibale” që e karakterizon, duke shmangur gabimet që i kushtuan pikë në disa ndeshje të fundit.
Si ka ndryshuar Atalanta
Ndryshimet më të mëdha janë në radhët e Atalantës. Ademola Lookman, i cili në gusht ishte i shpërqendruar nga thashethemet për një transferim te PSG, tani është në formë të plotë. Gjithashtu, largimi i Koopmeiners te Juventus dhe zëvendësimet e përkohshme në mbrojtje kishin ndikuar negativisht në ekip në atë kohë. Në gusht, Gasperini u detyrua të improvizonte një mbrojtje me de Roon dhe Ruggeri, ndërsa De Ketelaere ishte jashtë formacionit titullar.
Tani, pas një serie të suksesshme rezultatesh në kampionat, Atalanta duket më e fortë dhe më e bashkuar, e gatshme të sfidojë Interin në kushte “normale”.
Deklaratat para ndeshjes
Në konferencën për shtyp para ndeshjes, Gasperini u shpreh optimist:
“Është hera e parë që luajmë kundër Interit në kushte normale. Për ne, kjo është një ndeshje shumë e rëndësishme, ndryshe nga ato të kampionatit. Është një përballje që vendoset në 90 minuta, kështu që duhet parë nga një këndvështrim tjetër.”
Nga ana tjetër, trajneri i Interit, Simone Inzaghi, paralajmëroi për rrezikun që paraqet Atalanta:
“Në fushë nuk vlejnë të kaluarat. Në gusht, ata kishin shumë mungesa dhe ne e përfituam këtë. Tani, pas tre muajsh e gjysmë të shkëlqyer, ata janë një ekip i fortë fizikisht dhe me shumë cilësi. Na duhet një Inter i madh për t’i mposhtur.”
Sfida në horizont
Ndeshja e 2 janarit në Arabinë Saudite do të jetë një provë e vërtetë për të dyja ekipet. Interi synon të vazhdojë dominimin e tij, ndërsa Atalanta kërkon të tregojë se është një ekip që meriton të garojë për trofe të mëdhenj.
