Rajoni i Andaluzisë në Spanjë është goditur rëndë nga stuhia “Leonardo”, e cila ka sjellë reshje intensive shiu dhe përmbytje të shumta.
Të mërkurën në mëngjes, banorët u përballën me një situatë alarmante, pasi reshjet e pandërprera shkaktuan probleme serioze në infrastrukturë dhe jetën e përditshme.
Në disa zona, reshjet kanë arritur deri në 200 litra për metër katror, duke prekur qytete të mëdha si Sevilja dhe Malaga. Rrugë të tëra janë përmbytur, qarkullimi i automjeteve është ndërprerë dhe shërbimet e emergjencës janë vënë në gatishmëri të plotë për të përballuar situatat kritike.
Autoritetet lokale kanë shpallur gjendje të jashtëzakonshme dhe kanë nisur evakuime në zonat më të rrezikuara.
Reshjet e dendura kanë sjellë daljen nga shtrati të disa lumenjve, duke përmbytur zona të gjera dhe duke bllokuar akse të rëndësishme rrugore.
Raportimet flasin për dëme të konsiderueshme materiale, ndërsa ndërprerjet e energjisë elektrike kanë prekur mijëra banorë.
Autoritetet spanjolle e cilësojnë këtë situatë si një nga më të rëndat e këtij sezoni, pasi stuhitë me një intensitet të tillë janë të rralla.
Paniku dhe frika janë përhapur mes banorëve, ndërsa apelohet për kujdes dhe bashkëpunim me institucionet përgjegjëse.
Ekipet e emergjencës vijojnë punën për të ndihmuar të prekurit nga përmbytjet, duke ofruar strehim dhe ndihmë emergjente.
Ndërkohë, qeveria spanjolle ka angazhuar burime shtesë për operacionet e shpëtimit dhe pastrimit, ndërsa meteorologët paralajmërojnë se stuhia “Leonardo” pritet të vazhdojë të ndikojë rajonin edhe për disa ditë, duke rritur rrezikun e përmbytjeve të tjera.
