Portieri gjerman nuk po arrin t’i shpëtojë një vargu dëmtimesh. Qëndrimi i Ter Stegen te Girona mund të ndërpritet para kohe.
Sipas Jijantes FC, portieri 33-vjeçar i Barcelonës, Marc-André ter Stegen, aktualisht i huazuar te Girona, ka pësuar një dëmtim serioz në muskujt e kofshës (hamstring), me përfshirje të mundshme të tendinit.
Raportohet se Ter Stegen po i nënshtrohet ende ekzaminimeve mjekësore dhe nuk ka ende një vendim përfundimtar nga stafi mjekësor. Megjithatë, nëse do të ketë nevojë për operacion, kjo do t’i japë fund aventurës së tij te Girona.
Ter Stegen iu bashkua Gironës në janar, në huazim gjashtëmujor nga Barcelona, por arriti të luajë vetëm dy ndeshje përpara se të përfundonte në infermieri.
Vitin e kaluar, ai mungoi për një periudhë të gjatë për shkak të një dëmtimi në shpinë, dhe siç duket, problemet fizike vazhdojnë ta ndjekin portierin gjerman.
