Izraeli po përballet me një debat të fuqishëm politik dhe shoqëror mbi rikthimin e dënimit me vdekje pas sulmeve të Hamasit më 7 tetor 2023. Një projektligj i ri, i mbështetur nga e djathta ekstreme, parashikon dënimin kapital për palestinezët që akuzohen për sulme terroriste me pasoja fatale. Zvika Fogel, kryetar i komisionit parlamentar për sigurinë kombëtare, e konsideron këtë ligj si një masë të nevojshme për mbrojtjen e qytetarëve izraelitë, duke thënë se rikthimi i dënimit me vdekje është “më morali, më hebraik dhe më i drejtë”.
Ky ligj është mbështetur fuqishëm nga familjarë të viktimave të sulmeve. Megjithatë, organizatat për të drejtat e njeriut e kanë kritikuar ashpër këtë nismë, duke e cilësuar si një nga propozimet më ekstreme në historinë e Izraelit. Ata theksojnë se ligji është etikisht i papranueshëm dhe ligjërisht diskriminues, pasi do të zbatohej vetëm ndaj palestinezëve. Tal Steiner, drejtoreshë e organizatës HaMoked, e përshkruan atë si një ligj racor.
Kritikët e ligjit argumentojnë se ai shkel parimet e të drejtës për jetën, është në kundërshtim me ligjin hebraik dhe rrit rrezikun e ekzekutimit të individëve të pafajshëm. Drafti parashikon që dënimi me vdekje të vendoset në gjykatat ushtarake, të cilat veprojnë vetëm për palestinezët nga Bregu Perëndimor, dhe ekzekutimi duhet të realizohet brenda 90 ditëve pas një ankese të detyrueshme. Egziston mundësia e dënimit me vdekje në gjykatat civile, por ky do të ishte i mundshëm dhe jo i detyrueshëm.
Deri më tani, Izraeli ka zbatuar dënimin me vdekje vetëm dy herë, përfshirë rastin e Adolf Eichmann, arkitektit të Holokaustit. Edhe pse më parë, shërbimi i sigurisë izraelite kishte qenë kundër dënimit me vdekje, mbështetësit e projektligjit pretendojnë se qëndrimi është ndryshuar pas ngjarjeve të 7 tetorit. Shumë izraelitë mbeten të ndarë midis atyre që e shohin ligjin si një mjet mbijetese dhe atyre që e konsiderojnë një hap të rrezikshëm drejt drejtësisë selektive.
