Autoriteti Kombëtar i Ushqimit (AKU) ka njoftuar tërheqjen e menjëhershme nga tregu të qumështit formulë për foshnja “APTAMIL 1 PRONUTRA 800 gram Advanced”, pas një alarmi të marrë nga Sistemi Evropian i Sigurisë Ushqimore (RASFF).
Gjatë një kontrolli të kryer në Gjermani, është konstatuar prania e substancës së rrezikshme cereulide, një toksinë që mund të shkaktojë helmim ushqimor me simptoma si të vjella dhe dhimbje barku, veçanërisht e rrezikshme për foshnjat.
Produkti është i destinuar për foshnja nga 0 deri në 2 vjeç dhe mban datën e skadencës 10 nëntor 2026, çka e bën rrezikun edhe më serioz për shkak të përdorimit të mundshëm afatgjatë.
Alarmi për kontaminimin ka ardhur fillimisht nga shtetet e Bashkimit Evropian dhe më pas është shtrirë edhe në Shqipëri.
Sipas AKU-së, kompania importuese “Rossman Lala” ka sjellë në Shqipëri gjithsej 648 njësi të këtij produkti, nga të cilat 276 janë shpërndarë në tregun vendas, ndërsa 372 njësi janë eksportuar drejt Kosovës.
AKU bën të ditur se inspektorët e saj janë angazhuar në tërheqjen e produktit nga tregu në qytetet Tiranë, Durrës, Fier dhe Shkodër, si dhe në procedurat për asgjësimin e tij.
Qumështi formulë APTAMIL është ndër produktet më të shitura në tregun shqiptar, ndërkohë që bakteret si Bacillus cereus, të lidhura me toksinën cereulide, janë hasur edhe më herët në produkte të tjera të qumështit formulë, përfshirë raste të mëparshme me produkte të kompanisë Nestlé të tregtuara nga i njëjti distributor.
Autoriteti Kombëtar i Ushqimit u bën thirrje prindërve dhe konsumatorëve që, nëse kanë blerë këtë produkt, të mos e përdorin për ushqimin e foshnjave dhe ta kthejnë menjëherë në pikat e shitjes.
Ky njoftim është pjesë e angazhimit të AKU-së për garantimin e sigurisë ushqimore dhe mbrojtjen e shëndetit të fëmijëve.
