Kreu i grupit parlamentar të Partisë Demokratike, Gazment Bardhi, ka reaguar pas vendimit të SPAK për të mos pranuar komisionin e ashtuquajtur “Xhafaj 2”.
Në një reagim në rrjetet sociale, Bardhi shkruan se përpjekja e qeverisë për të ushtruar presion mbi Prokurorinë e Posaçme ka marrë një përgjigje të prerë nga SPAK.
Sipas tij, ky është një tjetër sulm i qeverisë ndaj sistemit të drejtësisë.
“Qeveria po përpiqet të intimidojë Prokurorinë e Posaçme përmes të ashtuquajturave inspektime të deputetëve, por kjo përpjekje është refuzuar nga SPAK, e cila i ka konsideruar këto vizita në kundërshtim me ligjin dhe me pavarësinë e institucionit,” shkruan Bardhi..
Bardhi shkruan se Edi Rama se po përpiqet të pengojë punën e drejtësisë dhe se intimidimi ndaj SPAK nuk do ta shpëtojë qeverinë nga përgjegjësia ligjore.
“Asnjë presion ndaj SPAK nuk do ta shpëtojë Edi Ramën dhe bashkëpunëtorët e tij nga përgjegjësia përpara ligjit,” shkruan ai.
I ashtuquajturi “Komision antikorrupsion”, sipas Ramës dhe Xhafajt do të shërbente për të adresuar një sërë problematikash, përfshirë edhe ecurinë e reformës në drejtësi, por të dy u akuzuan se kishin një plan për të vënë nën një kontroll më të rreptë drejtësinë.
