Leon Goretzka ka konfirmuar zyrtarisht se do të largohet nga Bayern Munich në fund të sezonit, duke mbyllur aventurën e tij me klubin pas përfundimit të kontratës këtë verë. Lajmin e bëri publik vetë mesfushori 30-vjeçar përmes një postimi emocional në Instagram, ku theksoi se ditët e fundit kanë qenë “më të trazuara se sa pritej”, por njëkohësisht i kanë sjellë qartësi.
Në mesazhin e tij, Goretzka sqaroi se, pavarësisht interesimit nga klube të mëdha, ai ka vendosur të qëndrojë te Bayern deri në fund të sezonit, për të luftuar për objektivat e mbetura. Po ashtu, ai zbuloi se pas bisedimeve “konstruktive”, klubi dhe lojtari kanë rënë dakord që bashkëpunimi i tyre i suksesshëm të përfundojë në verë, ndërsa për të “ka ardhur koha e duhur të nisë një kapitull të ri”.
Goretzka iu drejtua tifozëve me falënderim dhe kërkoi që skuadra të japë maksimumin deri në fund, si me Bayern-in ashtu edhe me kombëtaren, duke pasur në mendje edhe vitin e Kupës së Botës.
Mesfushori iu bashkua Bayern-it në vitin 2018 nga Schalke dhe gjatë viteve në Mynih ka fituar trofe të mëdhenj, përfshirë Ligën e Kampionëve (2020) dhe gjashtë tituj të Bundesligës, ndërsa ka zhvilluar rreth 292 ndeshje me bavarezët në të gjitha garat, sipas të dhënave të cituara nga raportimet e fundit.
