Kreu i Grupit Parlamentar të PS-së, Taulant Balla e cilësoi si të duhur vendimin për të shtyrë mbledhjen e Këshillit të Mandateve dhe Imunitetit për çështjen e Belinda Ballukut derisa të shprehet Gjykata Kushtetuese.
Në Konferencën e Kryetarëve, ku u zhvilluan debate për vendimin e Kuvendit, Balla tha se nëse PD ka ankesa mund ta ankimojë vendimmarrjen sipas rregullores.
Sipas tij, Kuvendi është palë në ngërçin kushtetues i krijuar për zëvendëskryeministren e pandehur, dhe për rrjedhojë vendimi për të pritur gjykatën është i duhuri.
“Nëse Grupi parlamentar i PD ka ankesa në lidhje me mbledhjen e Këshillit të Mandateve ta ankimojë këtë vendimmarrje sipas rregullores. Vendimi për të pritur Gjykatën Kushtetuese është vendimi i duhur sepse vetë Kuvendi është palë në këtë ngërç kushtetues.“, tha ai.
Komenti i tij vjen pas akuzave të demokratëve Jorida Tabaku dhe Gazment Bardhi, të cilët akuzuan se po pengohet qëllimisht drejtësia për të mbrojtur politikisht Belinda Ballukun, me urdhër të kryeministrit Edi Rama.
