Pas vërshëllimës së fundit në Lisbonë, ku Real Madridi u mposht 2–4 nga Benfica, Kylian Mbappé shkoi direkt në dhomat e zhveshjes për t’u përballur me shokët e skuadrës. Francezi shënoi dy gola, por as kjo nuk mjaftoi për të shpëtuar ekipin nga një mbrëmje katastrofike.
Në konferencën pas ndeshjes, Mbappé nuk e fshehu zemërimin dhe theksoi se Benfica kishte më shumë “luftë” në fushë:
“Sot nuk ishte çështje taktike apo cilësie. Ishte çështje shpirti gare – ata kishin më shumë se ne,” u shpreh ai, duke nënvizuar se përkushtimi i Realit nuk ishte në nivelin e një “klubi mbretëror”.
Ai e krahasoi qartë urinë e portugezëve me qasjen e Madridit:
“Pashë Benfikën duke luftuar si për jetën, por këtë nuk e pashë tek ne,” pranoi Mbappé.
Sulmuesi u irritua veçanërisht nga goli i fundit i pësuar në minutën 98, që erdhi nga portieri Anatoliy Trubin:
“Goli i fundit që pësuam – është turp për ne! Jemi tmerrësisht të paqëndrueshëm!” shtoi ai me tone të forta.
Si pasojë, Real Madridi e mbylli fazën në vendin e 9-të dhe në “playoff” mund të përballet sërish me Benfikën ose me norvegjezët e Bodø/Glimt. Shorti zhvillohet nesër, më 30 janar.
