Detaje të reja kanë dalë në dritë nga aksidenti tragjik i ndodhur sot në Rumani, ku humbën jetën shtatë tifozë të klubit grek PAOK. Autoritetet kanë konfirmuar se mes viktimave janë dhe dy shqiptarë.
Bëhet fjalë për shtetasit Vasil Pilos dhe Genci Sadiku. Dy shqiptarët udhëtonin në të njëjtin mjet i cili u përplas drejtpërdrejt me një kamion, duke rezultuar fatal për të gjithë personat që ndodheshin në furgon.
Pamjet e publikuara nga vendngjarja hedhin dritë mbi dinamikën e aksidentit. Nga videot rezulton se furgoni me të cilin udhëtonin shtatë tifozët po lëvizte në korsinë e gabuar, çka solli përplasjen “kokë më kokë” me mjetin e tonazhit të rëndë.
Autoritetet rumune vijojnë hetimet për të përcaktuar rrethanat e plota të aksidentit, ndërsa ngjarja ka tronditur jo vetëm komunitetin e tifozëve të PAOK, por edhe opinionin publik në Shqipëri dhe Greqi.
