Një rrjet i madh ndërkombëtar i trafikut të kokainës është paraqitur para gjykatës në qytetin Vannes të Francës. Sipas mediave franceze, bëhet fjalë për një organizatë kriminale me shtrirje të gjerë, që operonte nga Evropa deri në Australi.
Hetimet tregojnë se rrjeti funksiononte në nivele të larta organizimi, duke realizuar dërgesa të mëdha droge jashtë territorit francez.
Mes të pandehurve ka edhe shtetas shqiptarë, të cilët dyshohet se kishin një rol qendror në organizimin dhe koordinimin e trafikut ndërkombëtar të lëndëve narkotike.
Autoritetet bëjnë me dije se shqiptarët siguronin lidhjet ndërkombëtare dhe menaxhonin dërgesa që shkonin deri në Oqeani dhe Australi.
Një nga dërgesat më të mëdha që ka tërhequr vëmendjen e hetuesve ishte ajo e 41 kilogramëve kokainë, me një vlerë të përafërt rreth 3 milionë euro në treg.
Rrjeti përdorte struktura të ndërlikuara dhe role të ndara për secilin anëtar, përfshirë sigurimin e drogës, transportin dhe shpërndarjen e saj. Organizimi ishte i sofistikuar dhe synonte shmangien e kontrolleve policore në vendet evropiane.
