Të shtëna me armë janë raportuar mbrëmjen e sotme në kryeqytetin e Gjermanisë, Berlin.
Sipas Bild, në një apartament në rrugën Wichmannstraße, në zonën Tiergarten, janë gjetur pesë persona të plagosur. Dy prej tyre raportohet se ndodhen në gjendje kritike dhe po trajtohen në spital.
Një përfaqësues i qendrës operative të policisë ka deklaruar se për momentin nuk ka informacion zyrtar shtesë, pasi hetimet po zhvillohen në terren.
Burimet paraprake flasin për të shtëna me armë zjarri në apartamentin e katit të pestë. Policia ka arrestuar më shumë se një të dyshuar, por pa dhënë ende detaje mbi identitetin e tyre. Dosja pritet t’i kalojë njësisë speciale të hetimit të vrasjeve.
Një nga të plagosurit ka arritur të shkojë vetë në spitalin Franziskus-Krankenhaus për të kërkuar ndihmë mjekësore. Ndërkohë, ekipet e emergjencës kanë dhënë ndihmën e parë në vendngjarje për një grua të plagosur rëndë, një burrë dhe dy persona të tjerë, të cilët më pas janë transportuar në spitale të ndryshme.
Policia vazhdon të ruajë me forca të shtuara si zonën përreth spitalit, ashtu edhe vendin e ngjarjes në Wichmannstraße, i cili mbetet i izoluar. Operacioni i autoriteteve është ende në vijim.
