Barcelona është rikthyer në vendin e parë të LaLiga-s pas fitores së pastër 3-0 ndaj Real Oviedo në “Camp Nou”. Pas një pjese të parë pa gola dhe jo në nivelin më të mirë, ekipi i Hansi Flick e ktheu ndeshjen në spektakël në 45 minutat e dyta, duke përfituar edhe nga gabimet individuale të kundërshtarit.
Goli që hapi ndeshjen erdhi në minutën e 52-të me Dani Olmo, i cili konfirmoi formën pozitive. Vetëm pesë minuta më vonë, Raphinha dyfishoi me një finalizim të bukur (chip), duke e qetësuar plotësisht Barcelonën. Goditjen përfundimtare e dha Lamine Yamal në minutën e 73-të, me një volej spektakolar për 3-0.
Pas ndeshjes u pranua se nuk ishte gjithçka perfekte në fillim: “E dinim që do të ishte e vështirë ndaj një ekipi që preson kështu. Nuk ishim në maksimum në disa momente, por pastaj shënuam golat dhe bëmë punën tonë”, u tha në vlerësimin pas takimit. Ndërkohë, nga kampi i Oviedos u theksua se ndeshja u vendos nga gabimet: “Po bënim një ndeshje shumë të mirë, por këto gabime ndaj këtij kundërshtari kushtojnë shumë.”
Me këtë triumf, Barça rimerr kreun me 52 pikë, një më shumë se Real Madrid (51). Për Oviedo, situata mbetet alarmante: janë në fund të tabelës me 13 pikë dhe pa fitore që nga fundi i shtatorit; nën drejtimin e Guillermo Almada bilanci është 3 barazime dhe 2 humbje.
