Një stuhi dimërore preku pothuajse të gjithë Shtetet e Bashkuara dhe po avancon drejt verilindjes, duke rrezikuar dhjetëra miliona amerikanë me ndërprerje energjie dhe kaos në transport. Pas goditjes në jugperëndim dhe qendër, stuhia tani ka mbuluar shtetet e mes-Atlantikut dhe verilindjes, ku janë regjistruar dëborë dhe shi ngrirës. Një masë ajri arktik është shtrirë në mbarë territorin amerikan, duke përkeqësuar ndjeshëm kushtet e motit.
Shërbimi Kombëtar i Motit parashikon që efektet e borës dhe akullit do të vazhdojnë për disa ditë, me ngrirje të përsëritura që sjellin rreziqe për qarkullimin në rrugë dhe trotuarë. Sekretari i Transportit, Sean Duffy, theksoi se deri në 240 milionë amerikanë mund të preken nga kjo stuhi, dhe të paktën 20 shtete, përfshirë kryeqytetin Uashington, kanë shpallur gjendje emergjence.
Gjendja është veçanërisht e rëndë në aeroportet, ku rreth 14,000 fluturime janë anuluar dhe mijëra të tjera kanë pësuar vonesa. Ky chaos ka sjellë shqetësime të mëdha për udhëtarët. Ekipet e emergjencës, si dhe sekretarja e Sigurisë Kombëtare, Kristi Noem, kanë bërë thirrje për qendrim në shtëpi dhe kujdes ndaj të tjerëve, teksa kërkojnë respektimin e udhëzimeve të autoriteteve.
Presidenti amerikan, Donald Trump, ka deklaruar se administrata është duke monitoruar situatën dhe ka kërkuar që qytetarët të mbeten të sigurt dhe të ngrohtë. Meteorologët tregojnë se stuhia lidhet me një çrregullim të vorbullës polare, e cila sjell ajër jashtëzakonisht të ftohtë nga Arktiku në Amerikën e Veriut. Autoritetet paralajmërojnë se temperaturat ekstremisht të ulta do të vazhdojnë për javën e ardhshme, duke rritur rrezikun për shëndetin, siç është ngrirja e lëkurës brenda disa minutash. Situata është kritike dhe kërkon kujdes maksimal nga të gjithë qytetarët.
