Shtetet e Bashkuara dhe Europa po përgatiten për të investuar 800 miliardë dollarë në rindërtimin e Ukrainës pas përfundimit të pushtimit rus, sipas një dokumenti të ri të siguruar nga Politico dhe konfirmuar nga burime evropiane. Dokumenti përfshin një plan 10-vjeçar që synon rimëkëmbjen e vendit dhe integrimin e tij në Bashkimin Europian, me një samit të planifikuar në Bruksel më 22 janar për të diskutuar detajet e tij.
Strategjia e financimit shtrihet deri në vitin 2040 dhe përfshin një plan operativ 100-ditor për zbatimin e projektit. Megjithatë, ekspertët e BlackRock paralajmërojnë se tërheqja e investimeve të jashtme do të jetë e vështirë nëse konflikti vazhdon, duke theksuar se investitorët duan siguri para se të angazhohen. Philip Hilderbrand, nënkryetari i BlackRock, shpjegoi se investimi në një zonë lufte është një sfidë e madhe.
Plani i rindërtimit përjashton ndihmën emergjente dhe synon kalimin e Ukrainës në një fazë të prosperitetit të vetëmjaftueshëm. Shtetet e Bashkuara janë pozicionuar si partner strategjik dhe investitor, përveç rolit të tyre tradicional si donatorë. Një takim i rëndësishëm midis Ukrainës, Rusisë dhe SHBA-së do të mbahet në Abu Dhabi, ku Shtetet e Bashkuara pritet të luajnë një rol të rëndësishëm në rimëkëmbjen ekonomike të Ukrainës.
Sipas dokumentit, për 10 vitet e ardhshme, BE-ja dhe institucionet ndërkombëtare financiare, përfshirë Fondin Monetar Ndërkombëtar dhe Bankën Botërore, janë të angazhuara për të shpenzuar 500 miliardë dollarë në fonde publike dhe private për Ukrainën. Komisioni Evropian gjithashtu planifikon të ofrojë 100 miliardë euro përmes mbështetjes fiskale dhe garancive të investimeve.
Në fund, plani parashikon investime në projekte kritike në Ukrainë, duke përfshirë sektorët e mineraleve, infrastrukturës, energjisë dhe teknologjisë, me qëllimin për të përshpejtuar rikthimin e stabilitetit ekonomik dhe politik të vendit pas luftës.
