Dy vëllezër shqiptarë me precedentë penalë në Greqi janë arrestuar nga policia greke si autorë të dyshuar të shpërthimit me eksploziv në diskotekën “Jacky.O”, në rrugën Michalakopoulou të Athinës, mbrëmjen e 7 tetorit 2025.
Në pranga ranë Blerim Buçi, 41 vjeç, dhe Besmir Buçi, 32 vjeç, të dy banues në Tiranë. Përveç akuzës për vendosjen e lëndës shpërthyese, ndaj tyre rezultonte aktiv edhe një urdhër arresti për shkelje të kushteve kufizuese të qëndrimit, grabitje dhe shkelje të legjislacionit për armët.
Sipas hetimeve, 32-vjeçari Besmir Buçi pasi parkoi automjetin pranë lokalit, iu afrua në këmbë diskotekës, ku vendosi dhe aktivizoi një mjet shpërthyes të improvizuar. Më pas, ai u rikthye në automjet, ku e priste vëllai i tij, Blerim Buçi, dhe të dy u larguan nga vendngjarja.
Autoritetet greke bëjnë me dije se automjeti i përdorur në këtë akt kriminal u ishte siguruar nga një bashkëpunëtor i tyre, një shtetas grek 44-vjeçar.
Gjatë kontrolleve të kryera, u gjetën dhe u sekuestruan, një thikë palosëse, 8 telefona celularë, një pajisje telekomandimi me ekran, 2 fletore me shënime, veshje të përdorura gjatë shpërthimit, si dhe automjeti i mësipërm si mjet për kryerjen e aktit.
“… Për bombën, më punësoi një çift që kishte hesape të vjetra, siç më thanë, me pronarin e dyqanit, dhe më dhanë 5,000 euro që të shkoja ta vendosja.” Këto ishin të vetmet fjalë pranimi nga njëri prej dy burrave të arrestuar. Sipas hetimit të policisë, bomba ishte një “mesazh paralajmërues”. Autorët kërkuan para për ofrimin e mbrojtjes së paligjshme, por refuzimi kategorik i pronarit për t’iu nënshtruar shantazhit çoi në hakmarrje.
Gjatë operacionit, 41-vjeçari Blerim Buçi, u gjet në një zonë të pazbuluar në natyrë, ku u përpoq të fshihej. Kur policia iu afrua dhe u përpoq ta ndalonte, ai rezistoi duke u konfrontuar fizikisht me efektivët, por ata arritën ta ndalonin.
Personat e arrestuar, të cilët janë akuzuar në të kaluarën, ndër të tjera, për grabitje, mashtrim, dëmtim të rrezikshëm trupor, falsifikim, si dhe shkelje të ligjeve për drogën, u dërguan në autoritetin kompetent të ndjekjes penale.
