Sipas Daily Mail, legjenda e Chelsea-t, Marcel Desailly, ka hedhur një paralajmërim të fortë për të ardhmen e Cole Palmer, duke sugjeruar se ylli anglez mund të kërkojë transferim nëse humbet besimin te projekti i klubit dhe te ambicia për trofe.
Palmer shpërtheu menjëherë pas ardhjes nga Manchester City në verën e 2023, duke u kthyer në një nga emrat më të spikatur të një skuadre plot talente të reja, por ende të papjekura. Megjithatë, sezoni 2024/25 u përshkrua si më i “zbehtë” për të, ndërsa këtë edicion ai ka vuajtur shpesh nga dëmtime të vazhdueshme.
Detaji që “ngriti vetullat” te tifozët erdhi në fitoren 2-0 ndaj Brentford të shtunën: Palmer shënoi nga pika e bardhë, por u vu re se nuk festoi dhe në fund të ndeshjes dukej larg versionit të tij zakonisht të qeshur. Kjo ka shtuar spekulimet për gjendjen e tij dhe për raportin me situatën te klubi.
Desailly, duke folur për mediat, theksoi se do të donte ta shihte Palmerin të qëndronte në “Stamford Bridge”, por nënvizoi se lojtari kërkon stabilitet dhe një sistem që e vendos në qendër – ndërkohë që duhet edhe të rikthehet plotësisht nga dëmtimi në ije. Ai shtoi se Palmer duhet të mbetet i përulur dhe të ndihmojë ekipin, pavarësisht se çfarë vendimi do të marrë në të ardhmen.
Por thelbi i mesazhit të Desailly-t ishte i qartë: gjithçka varet nga pyetja nëse Palmer beson se Chelsea mund të fitojë Premier League në dy sezonet e ardhshme. Nëse jo, Desailly lë të kuptohet se ai mund të kërkojë një rrugëdalje drejt një klubi që “ndërton sistem rreth tij”.
Në të njëjtën kohë, Chelsea po kalon turbulenca: Enzo Maresca u largua papritur në Ditën e Vitit të Ri, mes zërave për përfshirjen e fortë të drejtuesve, ndërsa klubi emëroi Liam Rosenior – i cili tani ka barrën të justifikojë ambiciet për trofe. Pakënaqësia ka shpërthyer edhe në tribuna: tifozë protestuan kundër pronarëve BlueCo, duke akuzuar klubin se po menaxhohet më shumë si “fermë tregtie lojtarësh” sesa si një skuadër elitare që synon rezultate të menjëhershme, pavarësisht shpenzimeve mbi 1 miliard paund që nga 2022.
