Komisioni Qendror i Zgjedhjeve ka vendosur të hedhë një hap drejt depolitizimit të procesit të administrimit dhe numërimit të votave në 11 maj, duke larguar partitë politike nga numërimi i votës së diasporës.
Në draftin e hartuar nga KQZ, që do të diskutohet ditën e hënë është parashikuar që për votën e diasporës të ngrihen struktura të posaçme vlerësimi e numërimi të votave.
Sipas këtij drafti Komisioni i Numërimit dhe Vlerësimit të Votës nga Jashtë, dhe Grupet e Numërimit, të Votave nga Jashtë do të përbëhen nga anëtarë të caktuar nga KQZ, ndërkohë që dy partitë e mëdha PD e PS do të kenë vetëm vëzhgues.
“Komisioni i Numërimit dhe Vlerësimit të Votës nga Jashtë përbëhet nga tre anëtarë të caktuar nga KQZ, jo më vonë se 20 ditë përpara datës së zgjedhjeve. Partia më e madhe e shumicës parlamentare dhe partia më e madhe e pakicës parlamentare kanë të drejtë të caktojnë nga një anëtar vëzhgues.”
Por mësohet se propozimi i KQZ për të depolitizuar procesin e numërimit të votës së emigrantëve, është i papranueshëm për opozitën.
Burime pranë PD bëjnë me dije se për votën e diasporës duhet të ruhen të njëjtat rregulla që parashikon Kodi Zgjedhor për administrimin dhe numërimin e votës së shqiptarëve që jetojnë brenda vendit.
PD sjell në vëmendje se kodi është i qartë. Komisioni Zonal i Administrimit Zgjedhor përbëhet nga përfaqësues të mazhorancës e opozitës e po ashtu grupet e numërimit kanë një përfaqësues nga partia më e madhe e mazhorancës, një nga partia e dytë e mazhorancës dhe një nga partia më e madhe e opozitës e një nga partia e dytë e opozitës; ndaj ky rregull duhet të zbatohet edhe për votën e diasporës e cila për herë të parë do të zbatohet në zgjedhjet parlamentare të 11 majit.
