Batman është shndërruar në Robin dhe Robin është shndërruar në Batman. Kjo “mutacion” duket se po ndodh që prej disa kohësh, që kur Lautaro Martinez dhe Marcus Thuram duket se kanë ndërruar rolet në repartin ofensiv të Interit.
Nëse francezi është tashmë golashënuesi më i mirë i Serie A, së bashku me Retegui të Atalantës, Lautaro po kalon një periudhë të gjatë agjërimi për gola. Dhe nuk është hera e parë në karrierën e tij që ndodh diçka e tillë. Në fakt, kjo i ka ndodhur edhe më parë.
Megjithatë, këtë herë duket edhe më e çuditshme, pasi po flasim për një sulmues që vetëm disa muaj më parë përfundoi në krye të listës së golashënuesve. Dhe tani, për një arsye ose tjetër, ai po sheh Thuram të shënojë dhe Interin të fitojë pa golat e tij. Por një mundësi për t’u rikthyer quhet Cagliari.
Lautaro ka shënuar vetëm 5 herë në 17 javët e para të kampionatit. Një vit më parë, në të njëjtën pikë të sezonit, ai kishte shënuar 18 gola. Siç mund të shihet lehtësisht, nuk ka asnjë krahasim nga kjo pikëpamje.
Ajo që të bën të mendosh është fakti që argjentinasi nuk ka shënuar që nga fillimi i dhjetorit: një gol vendimtar atëherë që i dha Interit fitoren ndaj Venezias. Që nga ajo kohë, heshtje: zero gola në kampionat, në Champions League apo në Kupën e Italisë ndaj Udineses.
Në total: tetë ndeshje pa gjetur rrugën drejt portës kundërshtare. Edhe pse, teknikisht, duhen numëruar gjashtë dhe disa minuta: Lautaro mungoi për shkak të një temperature ndaj Veronës dhe ndeshja kundër Fiorentinës u ndërpre pas incidentit të Bove-s.
Nuk është hera e parë
Siç vë në dukje Gazzetta dello Sport, kjo nuk është hera e parë që Lautaro e gjen veten në një situatë ku goli duket larg. Në sezonin 2021/2022, në vitin e parë të Inzaghit te Interi, agjërimi zgjati 10 ndeshje në të gjitha kompeticionet.
E njëjta gjë ndodhi edhe sezonin e kaluar, kur Lautaro u shpall golashënuesi më i mirë i Serie A. Ai kishte ndaluar për tetë ndeshje radhazi midis shkurtit dhe majit, duke u rikthyer në formë ndaj Frosinones. Edhe pse titulli i “mbretit të golave” ishte tashmë i sigurt, ai agjërim i ndaloi shpresat për të barazuar apo thyer rekordin e Higuain-it dhe Immobile-s (36 gola).
Inzaghi: “Do të shënojë sërish”
Lautaro nuk arriti të shënojë as ndaj Comos të hënën e kaluar. Dhe nëse Interi vuajti për të mposhtur ekipin e udhëhequr nga Fabregas, pika e tyre e referencës në sulm dukej e zbehur.
“Është vetëm një moment, unë kam qenë sulmues dhe i njoh këto periudha,” u shpreh Inzaghi pas ndeshjes. “Ndaj Lazios ishte një nga më pozitivët. Ai dëshiron të shënojë gola, por duhet të vazhdojë të punojë kështu. Sulmuesit po bëjnë një punë të madhe, edhe Arnautovic dhe Taremi po bëjnë të njëjtën gjë si Thuram dhe Lautaro. Vitin e kaluar, sa herë që gjuante, shënonte; tani nuk ka fat. Por do të rikthehet të shënojë si gjithmonë.”
Çështja e rolit
Vetë Lautaro e ka pranuar që këtë sezon po luan një rol pak më të ndryshëm. “Jam sulmues dhe jetoj për golin. Por duhet të analizojmë edhe lojën që luajmë. Në këto muaj, po luaj më larg nga zona, sepse më pëlqen ta ndihmoj ekipin të ngjitet përpara: është diçka që po shtoj në lojën time dhe ndjehem mirë kështu.”
Thuram është më qendror dhe më i avancuar, por kjo nuk është një strategji e menduar: vjen nga kuptimi ynë në fushë. Vitin e kaluar ishte ai që shpesh tërhiqej pas ose shkonte në krahë, tani është radha e tij të shënojë më shumë gola”.
Cagliari për t’u zhbllokuar
Sot, Interi luan në Cagliari dhe Lautaro ka arsye për t’u entuziazmuar: pas Salernitanës, viktima e tij e preferuar është Cagliari. Ai ka shënuar 9 gola në 7 ndeshje ndaj tyre (dy të tjera i ka kaluar në stol).
Sezonin e kaluar, Lautaro shënoi në Unipol Domus, në javën e dytë të kampionatit. Tani, ai kërkon ta përsërisë këtë sukses. Për të mbajtur ekipin në krye, por edhe për të thyer një agjërim që po bëhet gjithnjë e më i bezdisshëm.
