Liga e Kampionëve rikthehet këtë të martë me raundin e 7-të të fazës së ligës, ku programi sjell nëntë ndeshje që mund të japin edhe sinjalet e para për ekipet që sigurojnë kualifikimin.
Në qendër të vëmendjes është përballja e madhe në Itali, Inter–Arsenal. Të dyja skuadrat vijnë në formë shumë të mirë dhe kërkojnë fitoren. Arsenali ka fituar të gjashta ndeshjet e para dhe është vetëm një hap larg kalimit më tej, ndërsa Interi mban vendin e gjashtë me 12 pikë.
Interesant pritet edhe dueli në Londër, ku Tottenhami pret Borussia Dortmundin. Të dy ekipet ndodhen në mes të renditjes dhe rezultati mund të ndikojë shumë në vazhdimësinë e tyre në garë.
Real Madridi synon të kthehet te fitorja në “shtëpi” ndaj Monacos, ndërsa Napoli luan në transfertë përballë Copenhagenit.
Kampionët në fuqi të PSG-së udhëtojnë në Portugali për ndeshjen me Sporting Lisbonën.
Ndeshjet e tjera të mbrëmjes janë: Villarreal–Ajax, Olympiacos–Bayer Leverkusen, Bodø/Glimt–Manchester City dhe Kairat Almaty–Club Brugge.
