Debutimi i Endrick në Ligue 1 shkaktoi entuziazëm të madh në “Groupama Stadium” të Lyonit. Sulmuesi brazilian, i ardhur në huazim nga Real Madridi, u shpall edhe MVP në ndeshjen ndaj Brest, duke konfirmuar nisjen e fortë: 1 gol dhe 1 asist në dy paraqitjet e para me skuadrën franceze.
Endrick i deshën vetëm dy minuta për ta ndezur stadiumin me driblime dhe shpërthime të shpejta në krah. Pas golit në ndeshjen e parë në Kupën e Francës ndaj Lille, edhe debutimi në kampionat ishte në lartësinë e pritshmërive. Mbi 50 mijë bileta ishin shitur paraprakisht dhe stadiumi ishte plot për paraqitjen e parë të “talentit të artë” në Rhône. Brest e pati të vështirë ta ndalte dhe, ndonëse nuk shënoi, ai dhuroi një asist dhe krijoi disa raste e momente të paharrueshme.
Fenomeni Endrick është aq i madh, sa L’Équipe thekson se lojtari “e ka pushtuar tashmë Lyonin”. Gazeta franceze vlerëson performancën e tij në krahun e djathtë: përshpejtimet e dyfishta, kontrollin e topit në lëvizje dhe repertorin e pasur të driblimeve, që “ngjallën emocione të rralla” te publiku. Sipas saj, kjo premton shumë për fuqinë sulmuese të Lyonit, sidomos kur të rikthehen edhe Malick Fofana dhe Ernest Nuamah.
Endrick nuk reshti së provuari gjatë gjithë ndeshjes, ndërsa përfitoi edhe nga përjashtimi i hershëm i një lojtari të Brest. Edhe pse te Real Madridi kishte pak minuta në fillim të sezonit, kjo nuk e ka penguar të shfaqë shpejtësinë në krah, të krijojë hapësira për shokët dhe të tregojë fuqinë e madhe që ka në këmbën e majtë.
Në pjesën e parë, ai prodhoi një aksion brilant që i parapriu asistit për bashkëkombasin e tij, Abner. Stadiumi shpërthente në duartrokitje pothuajse në çdo prekje të tij. Në pjesën e dytë, me një pasim me “jashtë shputës” në stilin e Modrić, ai e nxori Tessmann përballë portierit, por amerikani nuk arriti ta shfrytëzonte rastin.
Në Francë, Endrick është pritur si një yll global dhe Lyon duket se ka fituar një armë të nivelit të lartë në sulm. Skuadra e Paulo Fonseca-s ka fituar çdo ndeshje këtë vit, ndërsa Endrick ka deklaruar se erdhi për ta ndihmuar klubin të mbyllë një thatësirë 14-vjeçare pa titull.
Pas ndeshjes ndaj Brest, “Boby” u shpreh: “E kisha parë sa i madh dhe i bukur ishte stadiumi. E kisha imagjinuar veten duke luajtur aty me kaq shumë njerëz. Ishte e pabesueshme.” Një nga çelësat e formës së tij është vetë Fonseca: trajneri portugez e bindi në nëntor, pas një telefonate, të zgjidhte Lyonin dhe i ka dhënë liri të plotë në fushë, duke e aktivizuar në krahun e djathtë që të shfrytëzojë maksimumin e potencialit.
Aventura vazhdon javën e ardhshme në transfertë ndaj Metz, në një kapitull të tretë që sapo ka nisur.
