Atlético Madrid po e rikthen sërish në fokus mesfushorin e Barcelonës, Marc Casadó. Drejtori sportiv i klubit madrilen, Mateu Alemany, mbetet i interesuar për 22-vjeçarin e dalë nga La Masia dhe e sheh si një alternativë të mundshme pas largimit të Conor Gallagher drejt Tottenhamit.
Sipas Mundo Deportivo, Atlético ka edhe emra të tjerë në listë si João Gomes (Wolverhampton) dhe Ederson (Atalanta), por vlerat e tyre në treg janë më të larta se ajo e Casadó-s. Deri tani nuk ka një ofertë zyrtare, por si klubi katalanas ashtu edhe agjenti i lojtarit, Jorge Mendes, janë të informuar për interesimin e Atleticos.
Fillimisht, Casadó preferonte ta mbyllte sezonin te Barcelona, “klubi i jetës” për të, dhe nëse do të largohej, po e mendonte më shumë një opsion jashtë Spanjës. Megjithatë, raportimet thonë se tani ai është më i hapur edhe për një kalim te Atlético dhe po pret zhvillimet në ditët e fundit të merkatos së dimrit.
Kujtohet se edhe verën e kaluar Diego Simeone e kishte në radar Casadó-n, por atëherë mesfushori vendosi të qëndronte te Barcelona.
Në garë thuhet se janë edhe Manchester United dhe Wolverhampton, të cilët po e monitorojnë situatën. United ka shfaqur interes konkret, ndërsa Wolverhampton e mban katalanasin në listën e shkurtër për të forcuar mesfushën. Këtë sezon, Casadó ka luajtur 19 ndeshje dhe ka dhënë 1 asist (në La Liga ndaj Valencias), ndërsa Transfermarkt e vlerëson rreth 25 milionë euro.
