Ministria e Migracionit dhe Azilit në Greqi ka propozur një projektligj të ri që do të sjellë ndryshime të rëndësishme në sistemin e emigracionit ligjor. Ky projektligj ka për qëllim të adresojë problemet në lidhje me lëshimin dhe rinovimin e lejeve të qëndrimit, të reduktojë burokracinë dhe të përmbushë nevojat e tregut të punës në Greqi.
Documenti pritet të dorëzohet në Komisionin përkatës Parlamentar në një kohë kur emigracioni është bërë një temë qendrore në debat, si në nivel nacional ashtu edhe evropian. Sipas ministit Thanos Plevris, qëllimi kryesor është të bëhet një ndarje e qartë mes emigracionit ligjor dhe atij të paligjshëm.
Aktualisht, në Greqi jetojnë rreth 793 mijë emigrantë me dokumente të rregullta, ndërsa ka rreth 293 mijë aplikime për leje qëndrimi në pritje. Këto vonesa kanë shkaktuar pasiguri dhe vështirësi për ata që aplikojnë, pasi shpesh lejet e qëndrimit lëshohen me vonesë apo pas skadimit. Me rregullat e reja, pritet që të zgjidhen rreth 90 mijë leje qëndrimi menjëherë dhe 90 mijë të tjera brenda dy viteve të ardhshme.
Projektligji përfshin disa masa të rëndësishme, përfshirë rinovimin automatik të lejeve për ata që vazhdojnë të punojnë për të njëjtin punëdhënës, duke eleminuar nevojën për dokumente të tjera. Lejet e reja do të kenë një kohëzgjatje minimale prej dy vitesh për të reduktuar vonesat administrative.
Një dispozitë e veçantë ka për synim emigrantët që kanë jetuar ligjërisht në Greqi për pesë vjet ose më shumë, duke u dhënë mundësinë të riaplikojnë për leje qëndrimi. Ministria gjithashtu do të rrisë kapacitetin administrativ dhe do të lejojë transferimin e dosjeve mes rajoneve për të përshpejtuar proceset.
Së fundi, emigrantët e moshës mbi 65 vjeç, që kanë punuar ligjërisht për të paktën 20 vjet, do të mund të qëndrojnë në Greqi pa pasur detyrimin për të punuar, me kusht të kenë sigurim shëndetësor dhe pensione private. Një e dhënë e rëndësishme është se do të lejohet ndryshimi i punëdhënësve pa humbur statusin ligjor, duke rritur fleksibilitetin në tregun e punës dhe duke ulur rrezikun e shfrytëzimit.
