Forcat ruse filluan një sulm të madh me dron gjatë natës kundër 15 rajoneve të Ukrainës, duke dëmtuar ndërtesa tregtare dhe ndërtesa banimi, thanë sot autoritetet lokale, megjithëse deri më tani nuk ka raportime për viktima.
Ministria e Energjisë e Ukrainës njoftoi gjithashtu sot përmes Telegramit se dronët rusë dëmtuan linjat dhe nënstacionet e energjisë elektrike në rajonet e Kievit, Odessa dhe Ivano-Frankivsk.
Forcat Ajrore të Ukrainës thanë se rrëzuan 78 nga 105 dronë rusë gjatë sulmit, ndërsa 23 të tjerë u goditën nga kundërmasa elektronike.
Autoritetet në Kiev njoftuan se Forcat Ajrore rrëzuan rreth 15 dronë mbi qytet dhe rrethinat e tij gjatë një alarmi ajror që zgjati më shumë se pesë orë.
Serhii Popko, kreu i administratës ushtarake të kryeqytetit ukrainas, tha përmes Telegramit se mbeturinat nga një mjet ajror pa pilot ranë në lagjen Desnyansky, por shtoi se nuk shkaktoi ndonjë zjarr.
Megjithatë, sulmi gjatë natës shkaktoi zjarre në tre rrethe të tjera të rajonit të Kievit, të cilat më vonë u shuan, thanë autoritetet rajonale.
Një sulm në rajonin jugor të Odessa dëmtoi linjat e energjisë elektrike, tha guvernatori rajonal Oleh Kiper.
Ekuipazhet rivendosën energjinë në më shumë se 3,000 familje, megjithëse 2,000 të tjera mbetën pa energji në një nga rrethet, tha ai.
Dhjetra dronë rusë shënjestruan gjithashtu rajonin qendror të Ukrainës, Poltava, duke dëmtuar gjashtë ndërtesa tregtare dhe duke thyer xhamat në një ndërtesë apartamentesh dhe një kopsht fëmijësh, tha guvernatori Philip Pronin përmes Telegram.
Një tjetër sulm në rajonin qendror të Kirovohrad theu gjithashtu xhamat në një apartament dhe parkingje aty pranë, tha guvernatori Andrii Rajkoviç.
Forcat Ajrore rrëzuan 16 dronë në rajonin Cherkasy dhe mbeturinat shkaktuan një zjarr në pyll që më vonë u shua, thanë autoritetet lokale./ilirianews
