Asociacioni i Gazetarëve të Shqipërisë (AGSH) ka shprehur shqetësim të thellë pas deklaratave të Kryeministrit Edi Rama, i cili e quajti Radio Televizionin Publik Shqiptar (RTSH) një “dështim” dhe propozoi mbylljen ose privatizimin e tij. AGSH argumenton se këto opsione janë ekstreme dhe do të dëmtonin rëndë pluralizmin mediatik dhe të drejtën e publikut për një informacion të paanshëm.
Në deklaratën e saj, AGSH thekson se retorika politike që stigmatizon median publike dhe sugjeron zgjidhje drastike nuk është e justifikueshme, sidomos pa një analizë të thelluar dhe pa garantuar pavarësinë editoriale. Sipas AGSH-së, RTSH nuk është vetëm një ndërmarrje financiare, por një institucion që ka rol në garantimin e informacionit, kulturës dhe edukimit për qytetarët. Duke pare përgjegjësitë strukturore të RTSH-së, AGSH nënvizon se duhen parë edhe faktorët e jashtëm si ndërhyrjet politike dhe emërimet e kontestuara që kanë ndikuar në performancën e tij.
Për më tepër, AGSH i ka bërë thirrje institucioneve përgjegjëse që të refuzojnë financimin publik si një mjet për presion politik, sepse kjo rrezikon përfundimisht pavarësinë e medias publike. Në këtë kontekst, AGSH thekson se çdo reformë e nevojshme për RTSH-në duhet të ndërtohet mbi një dialog të gjerë me gazetarët, shoqërinë civile dhe ekspertët e medias, duke respektuar praktikat më të mira evropiane.
Asociacioni u shpreh gjithashtu se ka kërkuar reforma të thella në RTSH për vitet me radhë, përfshirë zgjedhjen e anëtarëve të Këshillit Drejtues dhe Drejtorit të Përgjithshëm, si dhe një reformë të brendshme strukturore. AGSH thekson se një reformë e tillë duhet të fokusohet në vendosjen e standardeve që garantojnë një media të lirë dhe të pavarur, e cila do të shërbejë interesit publik.
