Një histori komplekse dhe plot tension po zhvillohet mes Valentino Rossi, legjendarit të MotoGP, dhe babait të tij, Graziano Rossi. Konflikti ka lindur për shkak të dyshimeve për abuzim financiar, me vlera që arrijnë në qindra mijëra euro.
Sipas informacionit të publikuar nga Quotidiano Nazionale, Valentino akuzon partneren aktuale të babait të tij se ka përfituar nga dobësia e Graziano-s, duke tërhequr shuma të konsiderueshme parash gjatë kohës së bashkëjetesës së tyre. Çështja filloi në vitin 2024, kur Valentino u emërua administrator ligjor për Graziano-n, pas një raporti që e vlerësonte atë si të paaftë financiarisht. Në këtë moment, Valentino pretendon se u zbulua se partnerja e babait kishte tërhequr rreth 176 mijë euro nga llogaritë bankare të tij, përfshirë 100 mijë euro të justifikuara si “kredi” dhe rreth 34 mijë euro të tjera në para të gatshme.
Një vit më vonë, Graziano kërkoi që Valentino të hiqte dorë nga administrimi ligjor. Pasi Valentino refuzoi, Graziano ngriti një padi civile, dhe më 4 mars 2025, Gjykata e Pesaros vendosi në favor të tij, duke shpallur se ai ishte plotësisht në gjendje të merrte vendime për veten. Gjykata theksoi se Graziano kishte vazhduar aktivitetet e tij të përditshme, përfshirë drejtimin e makinës dhe pjesëmarrjen në gara rally.
Pas këtij vendimi, Valentino ka përqendruar kritikat e tij mbi partneren e babait, duke e akuzuar për mashtrim. Çështja ka rezultuar në një seri ekspertizash dhe kundër-ekspertizash të mbikëqyrura nga autoritetet, duke përfshirë raportet nga profesorë të universitetit. Një raport i fundit, i porositur nga gjyqtari hetues, konfirmon se Graziano nuk ka nevojë për ndihmë të jashtme.
Guardia di Finanza ka nisur një hetim mbi tërheqjet bankare nga llogaritë e Graziano-s, ndërsa prokurorja e Pesaros, Irene Lilliu, po shqyrton hapat e ardhshëm ndaj partneres së tij. Ndërkohë, nëna e Valentinos, Stefania Palma, dhe e bija e Graziano-s me partneren aktuale, Clara, janë lënë jashtë kësaj përplasje familjare. E gjithë situata është një ilustrim e një konflikti të thellë brenda një familjeje të njohur, ku ndjenjat e forta dhe interesat financiare janë duke u përplasar.
