Gjykata e Lartë, ka kthyer për rigjykim në Apelin e GJKKO-së, çështjen për ish-prokurorin e Vlorës, Aurel Zarka.
Në njoftimin e bërë publik këtë të enjte, Gjykata e Lartë njofton se ka vendosur “Prishjen e vendimit nr.62 (87-2025-398) datë 12.11.2025 të Gjykatës së Posaçme të Apelit për Korrupsionin dhe Krimin e Organizuar dhe dërgimin e çështjes për rishqyrtim në këtë gjykatë me tjetër trup gjykues.”
Apeli kërkoi që Zarka të gjykohej për “grup të strukturuar kriminal”, por ish-prokurori bëri rekurs në Gjykatën e Lartë më 4 dhjetor të vitit të kaluar.
Gjykata e Lartë ka vendosur prishjen e vendimit të Apelit dhe dërgimin e çështjes për rigjykim me një tjetër trupë gjykuese.
Kujtojmë se Gjykata e Shkallës së Parë e dënoi ish prokurorin Zarka me 2.8 vite burg në aplikim të gjykimit të shkurtuar, për ushtrim të ndikimit të paligjshëm dhe korrupsion.
