Bashkitë e qarkut Gjirokastër vazhdojnë të punojnë për të përballuar pasojat nga reshjet e fundit të shiut. Fokus i punës është pastrimi i rrugëve, largimi i dherave dhe vlerësimi i dëmeve në të gjithë territorin.
Në Bashkinë Gjirokastër, punë janë duke u kryer në disa zona të njësisë administrative Qytet, përfshirë lagjet “Granicë” e sipërme dhe “Zinxhira”, si dhe në zonën pas Kalasë. Dëmet e shkaktuara nga rrëshqitjet e dherave do të adresohen pas raportit të gjeologëve. Bashkia, në bashkëpunim me Forcat e Armatosura, do të vazhdojë punën në Lunxhëri, në pastrimin e aksit rrugor drejt fshatrave Dhoksat, Gjatë, Këllëz dhe Qestorat, si dhe në Lazarat.
Në Bashkinë Libohovë, rrugët hyrëse të fshatrave Zhej, Lliar dhe Topovë mbeten të bllokuara për shkak të rrëshqitjeve, duke pritur vlerësimin e gjeologëve për ndërhyrje. Në Memaliaj, një rrugë e brendshme është ende e bllokuar, me specialistët që pritet të japin rekomandimet e tyre për të vazhduar punën.
Dropulli gjithashtu ka një problem me dëmtimin e urës së Glinës, e cila ka pësuar dëme të tjera nga reshjet. Ndërsa në Bashkinë Përmet, aksin rrugor Përmet–Dogana e Tre Urave, ka një kalim të kufizuar në një segment të caktuar. Priten vlerësime gjeologjike për ndërhyrje në zone të tjera, ndërsa pastrimi i rrugëve të brendshme po vazhdon në disa fshatra.
Bashkia Këlcyrë raporton rikthimin e normalitetit në infrastrukturë pas pastrimeve, ndërsa në Tepelenë, rruga Subash–Hormovë është ende jofunksionale për mjete të rënda, me ndërhyrje që do të kryhen kur niveli i ujit të ulet në përroin e Tërbuqit.
Sipas OSHEE, qarku po furnizohet normalisht me energji elektrike, dhe lumenjtë Vjosë dhe Drino janë në nivele normale. Kjo situatë tregon angazhimin e bashkive për të rikthyer normalitetin dhe për të minimizuar pasojat e reshjeve të fundit.
