Roma është eliminua nga Kupa e Italisë pas një ndeshjeje dramatike kundër Torinos, e cila përfundoi me rezultatin 3-2. Ndeshja u zhvillua në stadiumin Olimpico dhe filloi me një dominim të skuadrës verdhekuqe, por më pas Torino mori kontrollin dhe siguroi kalimin në çerekfinale.
Che Adams ishte shkaktari kryesor i këtij eliminimi, pasi shënoi golin e parë në minutën e 10-të pas një asistimi nga Vlasic. Edhe pse Roma kishte filluar me impakt, Torino e kaloi në avantazh. Pas pushimit, trajneri i Romës, Gasperini, bëri dy zëvendësime strategjike, duke futur Ndicka dhe Hermoso. Ky i fundit ndikoi menjëherë, duke realizuar një gol të bukur në fillim të pjesës së dytë, duke barazuar rezultatin në 1-1.
Megjithatë, gëzimi i tifozëve të Romës ishte i shkurtër. Në minutën e 52-të, Adams shënoi sërish për Torino-n, duke rikthyer avantazhin në 2-1 dhe duke e bërë situatën më të ndërlikuar për Romën. Ekipi verdhekuq arriti të barazonte përsëri me një gol nga 16-vjeçari Arena në minutën e 81-të, i cili ndihmoi skuadrën të mbante shpresat për një kalim në raundin e ardhshëm.
Ajo që dukej se do të përfundonte me serinë e penalltive mori një kthesë dramatike në fund. Në minutën e 90-të, Ilkhan shënoi golin e tretë për Torinon, duke i dhënë fund shpresave të Romës për të vazhduar më tej në kompeticion. Ky gol final zyrtarizoi fitoren e Torinos dhe garantoi një vend mes tetë ekipeve më të mira të Kupës së Italisë.
Tani, Torino do të përballet me Interin në çerekfinale, ndërsa Roma përballet me kritikën dhe sfidat e reja në kampionat. Ky eliminim është një goditje për skuadrën verdhekuqe, e cila priste më shumë nga kjo garë.
