Një detaj interesant është zbuluar pak më parë lidhur me arratisjen spektakolare që i bëri policisë sot i burgosuri me rrezikshmëri të lartë Altin Ndoci.
Ndoci po merrte trajtim në spitalin rajonal të Durrësit, kur i kërkoi policëve që e shoqëronin sepse donte të shkonte në tualet. Në atë moment, ai përfitoi nga pakujdesia e zyrtarëve të shtetit, duke i goditur dhe ia mbathur jashtë ku e priste një automjet luksoz.
Më pas në media u publikua fotoja e një punonjësi policie i cili shfaqet me syze dhe një pistoletë në dorë, teksa mundohej të kuptojë se nga u zhduk i burgosuri për 4 vrasje dhe anëtar i një grupi të strukturuar kriminal.
Polici në fjalë është identifikuar si Fatjon Baci. Ai është i njëjti efektiv që vitin e kaluar u përmend në një tjetër episod të drejtësisë, pasi i dha telefonin e tij kryebashkiaut të burgosur të Tiranës, Erion veliaj, në momentin që ky i fundit transportohej me furgonin e burgjeve nga Durrësi për në SPAK.
Ky episod i shtoi Veliajt një akuzë të re në “malin e tij të akuzave”, atë të “Futjes së sendeve të ndaluara në ambientet e vuajtjes së dënimit.”
