Semestri filtrues në Itali: 220 studentë të Mjekësisë dërgohen në Tiranë, tarifa e lartë shkakton revoltë
Një lajm i publikuar nga televizioni italian Sky TG24 ka nxjerrë në pah një situatë që po shkakton polemika të forta në Itali: 220 studentë të pranuar në renditjen kombëtare për studimet në Mjekësi janë caktuar për të ndjekur studimet jo në Itali, por në Tiranë, në kampusin shqiptar të Universitetit “Tor Vergata” të Romës, konkretisht në Universitetin Katolik “Zoja e Këshillit të Mirë”.
Sipas raportimeve të Sky TG24 dhe agjencisë ANSA, kjo situatë është pasojë e zbatimit për herë të parë të sistemit të ashtuquajtur “semestri filtrues”. Studentët e kishin përzgjedhur këtë opsion mes alternativave të mundshme, por shumë prej tyre nuk e kishin kuptuar qartë se bëhej fjalë për një universitet privat jashtë Italisë, me tarifa shumë më të larta.
“Fillimisht nuk e kuptova që kisha bërë një gabim,” tregon Gaia, 20 vjeçe. “Në listë shkruhej ‘Medicina Roma Tor Vergata’ dhe ‘kampusi i Tiranës’ ishte në thonjëza. Mendova se ishte një degë e barazvlefshme me atë publike. Problemi lindi kur zbuluam se ishte universitet privat dhe se nuk kishim të njëjtat të drejta si kolegët tanë në Itali.”
Tarifa vjetore për studimet në Tiranë arrin në 9.650 euro, pa u marrë parasysh treguesi ekonomik familjar (ISEE), nga i cili studentët përfitojnë zakonisht në universitetet publike italiane. Afati për të vendosur nëse do të regjistrohen apo jo përfundon më 14 janar, ndërsa renditja u publikua më 8 janar, duke lënë shumë pak kohë për reflektim.
Chiara, një tjetër studente e përfshirë, shprehet se familja e saj nuk mund ta përballojë këtë shumë: “Në Itali përfitoj nga lehtësimet e ISEE-së. Këtu jo. Na lejohet vetëm ta ndajmë pagesën në tre këste, por shuma mbetet e njëjtë dhe është shumë e lartë krahasuar me tarifat publike në Itali.”
Edhe pse 220 vendet në Tiranë do të ishin plotësuar gjithsesi, pakënaqësia mes studentëve është e madhe. Rreth 40 prej tyre kanë krijuar një grup për të koordinuar veprimet, ndërsa shumë po mendojnë të mos regjistrohen fare. “Nëse do të kishim dashur ose mundur të ndiqnim një universitet privat, do ta kishim zgjedhur në Itali,” thekson Gaia.
Situata bëhet edhe më e ndërlikuar nga fakti se studimet në Tiranë nënkuptojnë, në parim, një angazhim gjashtëvjeçar. Pas vitit të parë, studentët mund të kërkojnë transferim, por pa asnjë garanci se do të pranohet. Për më tepër, universiteti nuk ofron strehim për studentët, ndërsa mungojnë marrëveshjet zyrtare për akomodimin.
Lajmi ka sjellë reagim edhe nga ministrja italiane e Arsimit të Lartë, Anna Maria Bernini, e cila – sipas Sky TG24 – e ka cilësuar të gabuar vendosjen e një tarife kaq të lartë për studentët e caktuar në Tiranë. Ajo ka kontaktuar rektorin e Universitetit “Tor Vergata” dhe ka kërkuar një rishikim të menjëhershëm të tarifave.
Ndërkohë, disa studentë po shqyrtojnë mundësinë e ankimimit ligjor, ndërsa debati mbi “semestrin filtrues” dhe dërgimin e studentëve jashtë vendit po intensifikohet në opinionin publik italian.
