Pasditen e së shtunës u zhvilluan ndeshjet e raundit 1/8 të finales së Kupës së Shqipërisë, ku u përcaktuan edhe tetë skuadrat që kaluan në çerekfinale dhe do të vazhdojnë garën për trofeun e dytë më të rëndësishëm të futbollit shqiptar.
Federata Shqiptare e Futbollit bëri të ditur se shorti për përcaktimin e çifteve të çerekfinaleve do të hidhet këtë të martë, më 13 janar, në orën 14:30, në ambientet e ‘Shtëpisë së Futbollit’.
Tetë skuadrat e kualifikuara janë ndarë në dy vazo. Në Vazon 1 janë Egnatia, Vllaznia, Partizani dhe Dinamo, ndërsa në Vazon 2 bëjnë pjesë Elbasani, Teuta, Bylis dhe Tirana. Shorti për përcaktimin e çifteve do të jetë i lirë, ndërsa ndeshjet do të zhvillohen me sistem vajtje-ardhje.
Ndeshjet e para të çerekfinaleve do të luhen në fushat e skuadrave të Vazos 2 më 11 shkurt, ndërsa ndeshjet e kthimit janë planifikuar për 4 mars.
Skuadra fituese në fuqi e Kupës së Shqipërisë është Dinamo, e cila do të tentojë të mbrojë titullin edhe për këtë edicion.
