Stuhia e fuqishme Goretti ka goditur disa vende të Evropës veriore, duke shkaktuar ndërprerje masive të energjisë, bllokim të transportit dhe mbyllje të shkollave.
Franca, Britania, Gjermania dhe Holanda raportojnë dëme të përhapura, ndërsa reshjet e dëborës dhe erërat e forta pritet të vazhdojnë në zonat më të prekura.
Në Britani, Zyrat Meteorologjike njoftuan se erërat kanë arritur deri në 159 km/orë, shifër rekord për rajonin e Ishujve Scilly. Aeroporti i Birminghamit u detyrua të pezullojë përkohësisht pistat, ndërsa në Midlands dhe Uells dhjetëra shkolla u mbyllën për shkak të kushteve të motit.
Në Francë, mbi 380 mijë shtëpi mbetën pa energji elektrike, kryesisht në Normandi dhe Bretanjë. Probleme të ngjashme u regjistruan në Britani ku rreth 57 mijë familje në Skoci dhe Angli janë ende në errësirë.
Holanda raportoi anulime fluturimesh si pasojë e dëborës së dendur, ndërsa linjat hekurudhore janë pezulluar pjesërisht.
Në Gjermani, autoritetet e motit e kanë cilësuar stuhinë një nga më të fortat e viteve të fundit për rajonin verior.
