Anësori ganez Antoine Semenyo u kthye në heroin e Bournemouth në javën e 21-të të Premier League, në përballjen ndaj Tottenham.
Semenyo i dha fitoren skuadrës së tij me një gol dramatik në minutën 90+5’, duke shënuar golin vendimtar në sekondat e fundit të ndeshjes. Sipas raportimeve, ky gol mund të jetë edhe “gol lamtumire” për Cherries, pasi po qarkullojnë zëra se 26-vjeçari është shumë pranë një transferimi te Manchester City. Kjo e bën sfidën ndaj Tottenham-it shumë të mundshme të jetë ndeshja e tij e fundit me Bournemouth.
Takimi dukej se po i rrëshqiste nga duart Bournemouth, sidomos pasi mesfushori i Spurs, João Palhinha, barazoi rezultatin në minutën e 76-të, duke lënë të kuptohej se ndeshja do të mbyllej në barazim. Por në fund, Semenyo tregoi klas dhe vendosi gjithçka me një goditje vendimtare, duke i dhënë ekipit tri pikë të arta.
Kur u zëvendësua dhe doli nga fusha, tifozët e Bournemouth në Vitality Stadium e përshëndetën me duartrokitje në këmbë, në një moment shumë emocional.
