Situata në qarkun Gjirokastër vijon të mbetet problematike si pasojë e reshjeve intensive të shiut gjatë orëve të fundit. Aksi rrugor Gjirokastër–Valares është i bllokuar në vendin e quajtur Aznak, duke vështirësuar qarkullimin e mjeteve.
Në pjesën më të madhe të qytetit të Gjirokastrës raportohet prani e konsiderueshme inertesh, të cilat kërkojnë ndërhyrjen e mjeteve të rënda për largimin e tyre. Aktualisht, reshjet e shiut kanë ulur intensitetin, megjithatë pasojat në terren mbeten të dukshme.
Sipas të dhënave zyrtare, niveli i lumit Vjosë në Memaliaj ka arritur në 6.5 metra, ndërsa situata po monitorohet në mënyrë të vazhdueshme nga autoritetet.
Nga bashkitë e tjera të qarkut, deri në këto momente, nuk raportohen situata emergjente. Megjithatë, reshjet intensive kanë shkaktuar dëmtime në disa rrugë malore në fshatrat e Bashkisë Gjirokastër, ku si pasojë e erozionit dhe shembjes së dherave, disa segmente janë bërë të pakalueshme për qarkullimin e automjeteve.
Autoritetet u bëjnë thirrje qytetarëve të tregojnë kujdes dhe të shmangin lëvizjet në akset problematike deri në normalizimin e plotë të situatës.
