Një mbrëmje plot emocione në Premier League u mbyll me një barazim të çmendur 2-2 mes Fulham dhe Liverpool, ku gjithçka u vendos në minutat e fundit. “The Reds” menduan se e fituan ndeshjen me gol në shtesë, por vendasit u përgjigjën menjëherë me një barazim shokues në 90’+7.
Fulham kaloi i pari në avantazh në minutën 17’, kur Harry Wilson realizoi për 1-0 pas asistit të Raúl Jiménez. Liverpool e rriti ritmin në pjesën e dytë dhe barazoi në 57’ me Florian Wirtz, i cili shënoi pas asistit të Conor Bradley (1-1), duke rikthyer ekipin në lojë.
Kur ndeshja po shkonte drejt mbylljes, erdhi drama: Cody Gakpo shënoi në 90’+4 për t’i dhënë Liverpool-it epërsinë 1-2, por Fulham nuk u dorëzua dhe Harrison Reed barazoi në 90’+7, duke shpërthyer stadiumin dhe duke i mohuar Liverpool-it tri pikë të arta.
Pas ndeshjes, Wirtz u shfaq i zhgënjyer: “Nuk jam aspak i kënaqur… ne na duhen pikët dhe donim fitoren.” Ai theksoi se Liverpool ishte më i mirë në pjesën e dytë, por pranoi se skuadra duhet të përmirësohet, sidomos në episodet vendimtare që po i kushtojnë pikë.
