Një moment i veçantë ndodhi në natën e Vitit të Ri, kur një avion Airbus i kompanisë Wizz Air, që fluturonte mbi Napoli, ndryshoi papritur kurs për t’u dhuruar pasagjerëve një pamje spektakolare të fishekzjarrëve.
Avioni me numër fluturimi W45154 po udhëtonte nga Barcelona drejt Tiranës, kur pikërisht në mesnatë, qielli mbi qytetin italian u ndriçua nga mijëra fishekzjarre. Në atë çast, ekuipazhi vendosi spontanisht të bëjë një xhiro shtesë mbi Napoli, në mënyrë që të gjithë pasagjerët të mund të shijonin spektaklin nga ajri.
Kapiteni i avionit, i njohur në rrjetet sociale si Captain Berg, publikoi më vonë pamjet nga kabina e pilotit, duke shkruar: “Në mesnatë mbi Napoli me një Airbus A321 – një spektakël fishekzjarrësh!” Kapiteni numëron mbi 600 mijë ndjekës në Instagram.
Në video shihen mijëra drita që ndriçojnë qytetin poshtë avionit. Nga një lartësi prej rreth 12 mijë metrash, fishekzjarrët e Vitit të Ri e bënë Napolin të shkëlqejë si kurrë më parë. Për t’u siguruar që të gjithë pasagjerët të kishin pamje sa më të mirë, piloti bëri një rrotullim të plotë mbi qytet, përpara se të vazhdonte rrugën drejt Tiranës.
Fluturimi kishte nisur dy minuta më herët nga Barcelona dhe përfundoi rreth 30 minuta përpara orarit të planifikuar, duke u ulur në mënyrë të sigurt në Tiranë pak para orës 01:00.
