Arsenali dha një mesazh force në Emirates Stadium, duke mposhtur bindshëm Aston Villa-n 4-1 dhe duke vazhduar të kryesojë tabelën në Premier League. Pas një pjese të parë më të kujdesshme, ekipi i Mikel Arteta-s shpërtheu në fraksionin e dytë me një seri golash që e mbyllën shpejt çdo diskutim.
Zhbllokimi erdhi në minutën e 48’, kur Gabriel kaloi “Topçinjtë” në avantazh (1-0). Vetëm katër minuta më pas, Zubimendi dyfishoi shifrat në 52’ pas asistit të Ødegaard (2-0), duke i dhënë Arsenalit kontroll total të ndeshjes.
Në minutën e 69’, Trossard shënoi për 3-0 pas një asisti nga Timber, ndërsa në 78’ ishte radha e Gabriel Jesus të vendoste “vulën” me golin e katërt, i shërbyer nga vetë Trossard (4-0). Aston Villa arriti vetëm golin e nderit në shtesë, me Watkins në 90’+4 (4-1).
Me këtë fitore të thellë në shtëpi, Arsenali jo vetëm merr tri pikë të arta, por edhe konfirmon momentin e fortë, duke ruajtur vendin e parë dhe presionin ndaj rivalëve në garën për titull.
