Manchester City u vu në provë të fortë në “City Ground”, por një gol i Rayan Cherki shtatë minuta nga fundi i dha skuadrës së Pep Guardiolës një fitore të rëndësishme, duke e mbajtur në hap me Arsenalin në garën për titullin e Premier League.
Nottingham Forest, që sezonin e kaluar ishte një nga surprizat e kampionatit, po kalon një edicion më të vështirë, por ndaj Cityt tregoi karakter dhe e çoi ndeshjen deri në limit. Edhe pse miqtë patën kontrollin e lojës për periudha të gjata, Forest u mbrojt mirë dhe krijoi momentet e veta të rrezikut.
Pjesa e parë pa ritëm, pak raste të pastra
45 minutat e para nuk prodhuan shumë raste të qarta. City e qarkulloi topin dhe e mbajti lojën nën kontroll, por pa i kthyer zotërimet në raste të pastra shënimi. Rasti më i mirë i pjesës së parë i takoi vendasve që në minutën e 7-të, kur Hudson-Odoi dërgoi një krosim të bukur në shtyllën e dytë, por as Gibbs-White dhe as Jesus nuk arritën ta devijonin në rrjetë. Nuk pati goditje në kuadrat, ndërsa në pushim të dy trajnerët kërkuan më shumë intensitet.
Pjesa e dytë “ndizet”: asist i Cherki, gol i Reijnders
Ndeshja ndryshoi pamje pas rifillimit. Forest tentoi ta nisë më mirë, por City ndërtoi me durim një aksion ku një pasim i Cherki nxori Reijnders përballë portierit Victor, dhe holandezi finalizoi saktë për avantazhin e miqve.
Megjithatë, reagimi i Forest ishte i shpejtë. Pas një kundërsulmi të organizuar mirë ku u përfshi Gibbs-White, topi u kthye pas për Hutchinson, i cili me vole barazoi rezultatin, duke e hapur plotësisht sfidën.
Fund dramatik: Cherki vendos ndeshjen
Minutat në vijim sollën ritëm të lartë dhe lojë të hapur, me Forest që shtoi presionin dhe kërkoi me ngulm golin e dytë. City u përpoq ta qetësonte lojën, por shpesh u gjend në vështirësi. Në minutën e 73-të, Foden pati një rast të mirë brenda zonës, por Victor reagoi saktë.
Dhjetë minuta më pas erdhi momenti vendimtar: pas një topi të kthyer në zonë nga goditja e këndit, Cherki lëshoi një goditje të fuqishme me të majtën dhe shënoi golin që vulosi fitoren, mes protestave të lojtarëve të Forest.
Në fund, Manchester City menaxhoi mirë minutat e mbetura dhe siguroi tri pikë shumë të rëndësishme për të ruajtur ritmin me Arsenalin në krye të renditjes.
