YouTube ka ndërmarrë masa të forta duke fshirë dy kanale të njohura që publikonin video të shkurtra dhe mashtruese për filma, të krijuara me ndihmën e inteligjencës artificiale. Bëhet fjalë për kanalet Screen Culture nga India dhe KH Studio nga Shtetet e Bashkuara, të cilat së bashku numëronin mbi 2 milionë abonentë dhe kishin grumbulluar më shumë se një miliard shikime.
Sipas platformës, këto kanale nuk e përdornin inteligjencën artificiale vetëm për qëllime kreative, por kombinonin pamje të gjeneruara me AI me skena reale nga filma ekzistues, duke krijuar trailerë jozyrtarë që mashtronin publikun.
Një nga rastet më të përfolura ishte ai i kanalit Screen Culture, i cili publikoi plot 23 versione të ndryshme të trailerit për filmin “Fantastic Four: First Steps”. Disa prej këtyre videove arritën më shumë shikime sesa traileri zyrtar i filmit.
Vendimi i YouTube vjen në një moment kur përdorimi i inteligjencës artificiale po rritet ndjeshëm në industrinë e filmit dhe përmbajtjes digjitale, duke ngritur shqetësime serioze për përhapjen e materialeve mashtruese që simulojnë personazhe dhe skena që nuk kanë ekzistuar kurrë.
