Qeveria shqiptare është skualifikuar nga Ministeriali i Energjisë së BE-së. Këshilli Ministerial i Komunitetit të Energjisë ka marrë një vendim ku konstaton se vendi ynë nuk ka zbatuar plotësisht detyrimet që rrjedhin nga Traktati i Komunitetit të Energjisë, marrëveshje që vendi ynë e ka firmosur prej vitesh në kuadër të integrimit europian.
Vendimi është miratuar më 18 dhjetor 2025 dhe lidhet me çështjen ECS-5/24, e hapur pas një kërkese të Sekretariatit të Komunitetit të Energjisë në maj 2024.
Pas shqyrtimit të situatës dhe një opinioni këshillimor, Këshilli Ministerial ka dalë në përfundimin se Shqipëria ka dështuar të harmonizojë në kohë legjislacionin e saj me rregullat europiane të tregut të energjisë elektrike.
Sipas dokumentit zyrtar, vendi ynë duhet të miratonte dhe të zbatonte një paketë ligjesh të cilat do të rregullonin funksionimin e tregut të energjisë elektrike, bazuar në Direktivën e Bashkimit Europian.
Në thelb, bëhet fjalë për:
-përditësimin e ligjit për tregun e energjisë elektrike;
-hapjen graduale të tregut sipas rregullave të BE-së;
-vendosjen e rregullave të qarta për prodhuesit, furnizuesit dhe operatorët e rrjetit;
-garantimin e konkurrencës dhe transparencës në treg;
-miratimin e akteve nënligjore që e bëjnë ligjin të zbatueshëm në praktikë.
Këto masa duhej të ishin në fuqi deri më 31 dhjetor 2023, por sipas Komunitetit të Energjisë, Shqipëria nuk i ka përfunduar dhe raportuar këto ndryshime brenda afatit, duke sjellë kështu shkelje të traktatit.
